Ég sagði ykkur þetta!

 

Í gær fór ég yfir þær breytingar sem gengu í gildi 1. mars s.l., vegna virðisaukaskatts og á vörugjalda.  Í framhaldi af því komu fram mikilvægar upplýsingar í kvöldfréttatímum að verðlækkanir í matvöruverslunum væru í samræmi við útreikninga Hagstofunnar á áhrifum nýlegra skattalækkana. Það er því greinilegt að lækkun á virðisaukaskatti á matvælum hefur skilað sér.

 

En það er eftir sem áður undir neytendunum sjálfum komið að fylgjast með sínu og það er ekki þar með sagt að ráðstöfunartekjur heimilisins lækki og það er undir hverjum og einum komið hvað hann ver til matvæla.

 

 

Lækkun matvælaverðs.

  Það voru gleðitíðindi fyrir neytendur er við framsóknarmenn stóðum að breytingum á virðisaukaskatti og á vörugjöldum sem tóku gildi 1. mars s.l..  Rifjum upp hvað það var sem lækkaði: 

 

• Virðisaukaskattur lækkaður á matvælum úr 14% í 7%.
• Matvæli sem bera 24,5% (sykur og slíkt) vsk. lækkuðu einnig niður í 7%.
• Vörugjöld af matvælum felld niður.
• Vsk. af veitingaþjónustu var lækkaður niður í 7%, var í 24,5%.
• Almennir tollar lækkaðir um allt að 40% af innfluttum kjötvörum.
• Ákvörðun hefur verið tekin um að heildsöluverð á mjólkurvörum verði óbreytt út næsta ár, 2007 og 2008.
• Virðisaukaskattur af bókum, blöðum og tímaritum var lækkaður úr 14 prósentum í 7 prósent.
• Virðisaukaskattur á hljómdiskum var lækkar úr 24,5 prósentum í 7 prósent.  Þannig lækkaði geisladiskur sem áður kostaði 2.199 krónur í 1.890 krónur.
• Virðisaukaskattur af heitu vatni, rafmagni til húshitunar og laugavatn lækkaði úr 14 prósentum í 7 prósent. 
• Virðisaukaskattur af veitingaþjónustu lækkaði úr 24,5 prósentum í 7 prósent.
• Virðisaukaskattur af afnotagjöldum sjónvarps og útvarps, jafnt sem útleigu á hótel- og gistiherbergjum lækkaði úr 14 prósentum í 7 prósent.

 Það er ekkert sjálfsagðra en að við neytendur spyrjum starfsfólk verslana um hvað vörur kostuðu áður en breytingin tók gildi, séum við þeirrar skoðunar að kaupmenn hafi hækkað álagninguna. Á sama tíma og þessir góðu hlutir eru að gerast þá hafa andstæðingar okkar hátt um það að hér fari flest í handaskolum – á tíma bestu lífskjara og mestu kaupmáttaraukningar sem orðið hefur í sögu þjóðarinnar. 

 Hverjar eru staðreyndirnar: 

• Hækkun kaupmáttar ráðstöfunartekna frá árinu 1995 til ársins 2007 eftir skatta er rúm 60%.
• Hækkun kaupmáttar launa á sama tíma er 35%.

 Þetta eru hreinar kjarabætur umfram verðbólgu. Hlustið á áróður andstæðingana meðan á þessu fer fram: STOPP-STOPP eða „Vinsamlegast gjörið svo vel að bíða aðeins!“ Ágætu lesendur, ykkar er valið á kjördag 12. maí, ég hef tekið ákvörðum með FRAMSÓKN lífskjara og velferð, setjum X við B!!

Vinstri Græningjar um atvinnusköpun - stangveiðar vaxandi atvinnugrein!!

 

Lesið vel eftirfarandi samtalsbút úr Ísland í dag, 28. mars s.l., þar sem Jón Bjarnason getur ekki nefnt eitt einasta mál til atvinnusköpunar nema stangeiðar, í umræðuþætti í Norðvesturkjördæmi.  Þetta er ekki boðlegt íslenskri þjóð að kjósa yfir slíka hneisu.  Takið eftir innskoti Magnúsar Stefánssonar, þetta er nákvæmlega hvað stefna Vinstri Græningja gengur út á!

 

 

Ísland í dag 28. mars 2007

Kosningar - Norðvesturkjördæmi.

 

Umsjónarmenn: Sigmundur Ernir Rúnarsson, Svanhildur Hólm Valsdóttir, Steingrímur Sævarr Ólafsson, Inga Lind Karlsdóttir og Egill Helgason.

Gestir: Magnús Stefánsson (B), Jón Bjarnason (Vg), Sturla Böðvarsson (D),

Guðbjartur Hannesson (S), Guðjón Arnar Kristjánsson (F).

[...

Sigmundur:       Jón Bjarnason, Vestfirðir voru kallaðir stóriðjulausa landssvæðið og umhverfisverndarsinnar voru mjög hrifnir af því, buðust til að koma með fullt af hugmyndum í staðinn til að spýta inn krafti í þetta sveitarfélag. Hingað til hafa hugmyndirnar verið núll. Hvar eru þessar hugmyndir?

 

Jón:                  Sko, nú sitjum við uppi með þessari ríkisstjórn og ég held að, ég er nú nýkominn af Vestfjörðum og ég held að Vestfirðingar þeir vilji nú segja stopp á þessa ríkisstjórn og losa sig við hana.

 

Sigmundur:       Hvar eru þessar hugmyndir?

 

Jón:                  Þær eru til, náttúra Vestfjarða er til áfram en við sitjum uppi með ríkisstjórn.

 

Sigmundur:       Er það stóra innspýtingin?

 

Jón:                  Við sitjum uppi með ríkisstjórn...

 

Svanhildur:        En hvernig skapar ..... störf?

 

Jón:                  ... sem rekur atvinnustefnu sem er Vestfirðingum mjög óhagstæð, vegakerfi...

 

Sigmundur:       Jón, hvar eru hugmyndirnar?

 

Jón:                  ... flutningskostnaðurinn...

 

Magnús?          Hvað myndir þú gera Jón?

 

Jón:                  Ég nefni loforð Framsóknarmanna um lækkun flutningskostnaðar...

 

Sigmundur:       Hvar eru hugmyndirnar?

 

Jón:                  Það verður að jafna samkeppnisstöðu Vestfjarða eins og annarra byggðarlaga og það hefur þessi ríkisstjórn ekki gert. Ég..

 

Svanhildur:        Nei, en hvernig myndir þú vilja gera það Jón?

 

Jón:                  ..ég myndi vilja stórauka vegaframkvæmdir á Vestfjörðum. Ég myndi vilja jafna flutningskostnaðinn. Ég myndi vilja taka upp...

 

Sigmundur:       Hvar eru atvinnutækifærin í héraðinu?

 

Jón:                  ...strandsiglingar. Einmitt, þegar þú hefur jafna samkeppnisstöðu fyrirtækjanna, atvinnulífsins, búsetunnar, fólksins þá byggist atvinnan upp. En núna, aðgerðir þessarar ríkisstjórnar hafa í rauninni barið niður samkeppnisstöðu þessarar byggðar og þess vegna...

 

Magnús?:          Þetta er blanko atvinnustefna.

 

Jón:                  ... er einmitt fólksfækkun um 20% á hvað, um 10 árum. Ekki getur það verið eitthvað til að hæla sér af. Þannig að það er þessi stefna þessarar ríkisstjórnar sem er Vestfirðingum, Norðvesturkjördæminu mjög andstætt og skapar þessa miklu andstæður sem eru í kjördæminu.

 

Sigmundur:       En örstutt bara, af hverju hefur engin hugmynd komið frá umhverfissinnum sem svar við því að Vestfirðir skuli vera stóriðju.....

 

Jón:                  Hún hefur komið. Meðal annars líka frá Fjórðungssambandi Vestfjarða sem hefur lýst þessu yfir sem stefnu sinni og ber að vinna að því en áherslur ríkisstjórnarinnar eru aðrar. Við tökum Látrabjarg, við tökum friðlandið í Hornströndum, við skulum taka veiðar, stangveiðar eða veiðar á fiski meðfram ströndum Vestfjarða sem er núna vaxandi atvinnugrein.

 

Sigmundur:       Eru þetta störf fyrir hundruð manna?

 

Jón:                  Það munar um hvert starf sem kemur.

 

Sigmundur:       Gott og vel. Gott og vel.

... ]

 

 

Verður VG sérstök og sameiginleg ógn?

 Í frægri hátíðarræðu á landsþingi VG fyrir nokkrum árum sagði Steingrímur J. Sigfússon að það jákvæða væri nú „að eiga hljómgrunn hjá miklu stærri hluta almennings í landinu en sem nemur þeim fjölda sem að endingu ákvað að kjósa okkur“. 

Orsökin var sú, að mati Steingríms, að „keppinautar okkar eða andstæðingar í stjórnmálum tóku smátt og smátt allir að líta á okkur sem sérstaka og sameiginlega ógn og hagsmunir þeirra fóru þ.a.l. saman í því að reyna að finna á okkur höggstað. ... Við getum ekki vænst þess að aðrir flokkar horfi á okkur taka aukið rými í heimi stjórnmálanna á þeirra kostnað án þess að bregðast við.“ 

Málið er að það er ekkert sem segir að hægt sé að sækja allt það fylgi sem hafi íhugað að styðja flokk, því það er alltaf við andstæðinga að berjast og við því þarf Framboðið að bregðast. Barlómur forystumanns í stjórnmálum er því meir undarlegri ef það er ekki verðugt verkefni flokksfélaga í alvöru flokki, sem vill verða stór, að takast á við andstæðingana sem reyna að finna höggstað á flokknum. 

Áskorunin í stjórnmálum fellst í því að þurfa að vinna eins mörg þingsæti og hægt er til að breyta, þ.e. að hafa áhrif á ríkistjórnina, embættismennina og þjóðfélagið í heild. Áfallið fyrir þá sem eiga ekki aðild að ríkisstjórn kallar á umræður og uppgjör innan flokka. Staða forystumann verður einnig veikari takist þeim ekki að skapa sér áhrifastöðu. 

Nú er að sjá hvort að Steingrímur Jóhann Sigfússon geti tekist á við góða mælingu eða vill VG hafa forystumann sem hræðist góða mælingu í könnunum?  Mín trú er að endingu muni lítill hluti kjósenda fylgja VG, enda mun STOPP-STOPP stefnan og STÓRA STOPP hugnast fáum landsmönnum!

Fæddur lítill prins

Frank bróðir eignaðist lítinn prins áðan, þannig að nú eru prinsarnir orðnir þrír.  Eva er enn eina prinsessan

Prinsinn var 16.5 mörk og 52 cm

Frank og Steinunn til hamingju með litla prinsinn

Uppbygging endurvinnsluþorps.

Var að lesa í Mogganum í morgun um uppbyggingu endurvinnsluþorps í Gufunesi. En þar er unnið að því að laða að einkafyrirtæki til að setja upp starfsemi endurvinnsluþorps.  Verð ég að taka undir að það sætir nokkrum tíðindum í umhverfismálum, að umhverfismál geti snúist um eitthvað annað en BARA umræðu um virkjanamál og uppbyggingu stóriðju.  En þannig má oft skilja stjórnarandstæðinga í orðræðunni. 

Fram kemur að vöxtur endurvinnslumarkaðarins sé mikill og talið að velta hans sé á fimmta milljarð króna nú þegar í dag.  Þenslan í hagkerfinu hefur að sjálfsögðu aukið neyslu og magn úrgangs á Íslandi. Neyslan er alltaf að aukast með ódýrum hlutum eins og frá iðnaðarveldinu Kína. 

Á liðnu flokksþingi Framsóknarflokksins var í ályktunum um endurvinnslu m.a. sagt:  „Auðlindir jarðarinnar eru takmarkaðar og ber því að endurnýta vörur eins mikið og kostur er og endurvinna það sem ekki er hægt að endurnýta. Urðun er sóunarlausn sem ber að takmarka eins og kostur er.“  Ofangreind tíðindi bera vott um hugarfarsbreytingu til góðs.

Ísland árið 2030?

Hvers vegna ekki að velta fyrir sér hvernig, eða hvað verði, í okkar nánustu framtíð.  Á liðnu flokksþingi okkar framsóknarmanna var m.a. velt fyrir sér framtíðinni og langar mig til að velta upp nokkrum punktum er þar komu fram. 

• Hugarfarsbreyting hefur orðið og markviss aðlögun í áttina að bættu fjölskyldulífi gerir það að verkum að fjölskyldan, vinir og kunningjar skipa stærri sess í hugum fólks.  Íslendingar munu með hækkandi meðalaldri leggja æ fleiri meira upp úr heilbrigðu líferni og vellíðan með hreyfingu og hollu mataræði.  Íslenskir neytendur munu leggja meira áherslu á uppruna, hreinleika og gæði matvæla en verði þeirra.  Þá munu valkostir vinnunnar verða fjölbreyttari um leið og vinnuumhverfið þykir sveigjanlegt. 

 

• Menning og listalíf blómstrar í landinu, enda auðugt menningarlíf eftirsótt og telst til stöðugt aukinna gæða fólks og samfélagsins í heild sinni.  Íslenska þjóðin er víðsýn og mun líta á ferðalög sem hluta sinna lífsgæða jafnt innanlands sem og út fyrir landsteinana.  Mikil uppbygging mun eiga sér stað í þjónustu við jaðra hálendisins og full sátt er í landinu um að þjónustustigi sé haldið lágu inni á sjálfu miðhálendinu. 

 

• Íbúar á Íslandi verða orðnir 500.000 árið 2030.  Líklegt verður að telja að um 30% landsmanna eða 150.000 manns eigi sér annað móðurmál en íslensku.  Þéttbýli höfuðborgarsvæðisins hefur stækkað og hærra hlutfall landsmanna býr úti um landið.  Öll láglend héruð landsins eru í byggð.  Í dreifbýli er búsetuform fjölbreyttara en áður, ýmist á bújörðum, í frístundabyggð eða í öðrum húsum þeirra sem kjósa að halda heimili sitt utan þéttbýlis.  Búsetumunstur hefur tekið breytingum og margir eiga tvö heimili, annað í þéttbýli, en hitt í dreifbýli.  Margir eru líka með annan fótinn erlendis.

 

• Flugsamgöngur eru góðar, sérstaklega við staði beggja vegna Atlantshafsins og taka á loft héðan á milli 40 og 50 farþegavélar dag hvern.  Vegna mikilla fjárfestinga í samgöngum og fjarskiptaneti er blómleg byggð og sterkir byggðakjarnar um land allt.

 

• Menntunarstig þjóðarinnar er með því hæsta sem gerist.  Háskólum vex stöðugt ásmegin og þeir hafa á sér æ aukinn alþjóðlegan blæ.  Atvinnulífið er orðið mun virkari þátttakandi í menntun og fræðslu landsmanna á öllum skólastigum.

 

• Atvinnuvegir eru fjölbreyttari en nokkru sinni áður og fjármálastarfsemi og hvers kyns sérfræðiráðgjöf eru mikilvægustu einstöku atvinnuvegir þjóðarinnar.  Landið er eftirsótt af ferðamönnum og slagar fjöldi þeirra upp undir 1 milljón á ári.  Tekjur þjóðarbúsins af ferðaþjónustunni eru miklar og fara ört vaxandi.

 

• Auðlindanýting og sala á eftirsóttri endurnýjanlegri orku innanlands og til útlanda skilar jöfnum og góðum tekjum til sameiginlegra þarfa.  Ísland er sjálfbært varðandi öflun og nýtingu orku og jarðefnaeldsneyti í samgöngum verður í lágmarki og markmið í loftslagsmálum um „kolefnislaust“ Ísland er orðið að veruleika. Horft er til Íslands sem fyrirmyndar í nýtingu vistvænnar orku.

 Að þessu sögðu langar mig til að kalla eftir viðhorfum ykkar og skoðunum, hvernig verður Ísland árið 2030?  Það er trú mín að hér á Íslandi séu spennandi tímar framundan!  

Bestibær Leikfélags Keflavíkur

Við systur buðum mömmu í tilefni af afmæli hennar,  á revíu Leikfélags Keflavíkur, sl. föstudag. Revían Bestibær, fjallar á gaman saman hátt um lífið í Reykjanesbæ.  Huldu Odds tekst mjög vel að sýna okkur lífið í Bestabæ eins og við áhorfendur sjáum það. Leikararnir fóru á kostum.  Jón Marinó var frábær í hlutverki Árna bæjó, Árni fékk alveg fyrir peninginn.   Einnig fannst mér Gunni vera frábær í hlutverki íþróttaálfssins í Latabæ.  Ég hvet alla til að skella sér á Bestabæ.  Það er alveg stórgóð skemmtun.  Takk fyrir mig Leikfélag Keflavíkur

Um ömurlega stjórnarandstöðu.

Sneypa stjórnarandstæðinga verður í minnum höfð í umræðum um þjóðareign á auðlindum, hún gengur á bak orða sinna og svíkur allar yfirlýsingar sínar, undir ábyrgðarlausri forystu Össurar Skarphéðinssonar. Tillaga formanna stjórnarflokkanna um þjóðareign á auðlindum hefur verið kynnt og rædd og sérstök þingnefnd hefur fjallað um hana. Afstaða okkar framsóknarmanna er afdráttarlaus:

• Við viljum þjóðareign á auðlindum Íslands, þannig að öllu hugsanlegu eignartilkalli annarra aðila sé hafnað og hnekkt í eitt skipti fyrir öll.
• Við viljum að nýtingarheimildir hafi áfram óbreytta stöðu, þannig að þær verði ekki háðar beinum eignarrétti heldur verði áfram afturkræfur afnotaréttur.
• Við viljum eyða réttaróvissu um þessi málefni.

 Fram hefur komið að tveir þriðjungar þjóðarinnar styðja þessi sjónarmið. Stjórnarandstaðan bauð samstarf á fjölmiðlafundi 5. mars sl. og sagði nægan tíma til að ljúka málinu sameiginlega og tillaga formanna stjórnarflokkanna samrýmist tilboði stjórnarandstöðunnar. Í meðferð málsins hefur komið berlega í ljós að stjórnarandstaðan stendur ekki við orð sín. Stjórnarandstæðingar vilja nota stjórnarskrármálið sem pólitískt bitbein í málþófi. Það er ekki markmið framsóknarmanna að knýja fram stjórnarskrárbreytingu í stórdeilum. Við framsóknarmenn leggjum enn sem fyrr þunga áherslu á auðlindamálið og það er ömurlegt til þess að vita að stjórnarandstöðunnar kemur í veg fyrir fullnaðarafgreiðslu málsins á þessu þingi.  

Hrollur

Var að lesa góðan pistil eftir Pétur Gunnarsson hér á blogginu, en hann segir m.a.:

„Ég var að horfa á Steingrím Jóhann Sigfússon máta sig við forsætisráðherrahlutverkið í fyrsta skipti á almannafæri. Það var í eldhúsdagsumræðum á Alþingi í kvöld. Hann kom með skrifaðan heimastíl  í fyrsta skipti árum saman við þetta tækifæri, fór með ljóð eftir Jónas Hallgrímsson, talaði landsföðurlega um gæfusama þjóð, sem kveður veturinn og gengur saman út í vorið. Þetta var einhvers konar áramótaávarp forsætisráðherra, gjörólíkt öllu því sem ég hef áður séð til Steingríms í ræðustól Alþingis.

Það liggur fyrir að ég er ekki helsti aðdáandi Steingríms en mér fannst hann ekki ná sér á strik í ábyrga landsföðurhlutverkinu. Hingað til hefur Steingrímur J. verið pottþétt skemmtiatriði í eldhúsdagsumræðum, talað það sem andinn blés honum í brjóst þar og þá, fljúgandi mælskur, rauður af reiði.

Það var rétt svo að það glitti í þann kappa sem maður kannast við í nokkrar sekúndur eða kannski hálfa mínútu í kvöld þegar hann skammaðist rétt aðeins út í ríkisstjórnina fyrir Írak, málefni RÚV og svikna vegaáætlun, kveinkaði sér undan ósanngjarnri gagnrýni og talaði um spunameistara.

Þá sleppti hönd hans aðeins taki á pontunni og hóf vísifingurinn reiðilega á loft. En það var bara í andartak, svo var eins og það rifjaðist upp fyrir Steingrími að hann var þarna kominn til að sýna þjóðinni hvernig hann tæki sig út sem forsætisráðherra. Höndin seig, greip um pontuna og Steingrímur J. Sigfússon fór að tala um gæfusama þjóð, veturinn og vorið."

En auðvitað eru Sjallar og Verðbólgu Grænir farnir að ræða saman um myndun næstu ríkisstjórnar, Steingrímur ætlar sér að selja sig dýrt, „hugsjónirnar“ munu fjúka út um gluggann á kosninganóttinni.  Við Íslenskri þjóð mun blasa á fyrsta degi, Steingrímur J. sem utanríkisráðherra, Ögmundur yrði iðnaðar- og viðskiptaráðherra, Jón Bjarnason menntamálaráðherra og Kolbrún Halldórsdóttir umhverfisráðherra. maður fær náttúrulega bara hroll við tilhugsina.